-Reymund Titong
KABANKALAN CITY, Negros Occidental — Wala sa giyapon may gina-tamwa nga hustisya ang pamilya Fausto matapos ang isa katuig nga pag-massacre sa asawa nga Billy kag Emilda, lakip na ang ila duwa ka bata nga si Ben kag Raben, sang Hunyo 14, 2023, sa Sitio Kangkiling, Barangay Buenavista, syudad sang Himamaylan.
Sa interview sang Brigada News FM-Kabankalan kay Himamaylan City deputy chief of police captain Arturo Margallo, Jr. sang nakaligad nga bulan, iya gin-pahayag nga ‘pending’ sa giyapon ang kaso nga murder nga inug-pasaka sa mga suspect sang pag-patay, bangud wala sa ila naga-coordinate ang kamagulanagan nga bata sang mag-asawa nga Fausto nga si Emily.
READ: International tribunal, gintudlo sa gobyerno sang Pilipinas ang pagpatay sa pamilya Fausto
Apang, sa gin-patigayon nga hearing sang International Peoples’ Tribunal sa pungsod Belgium, sang Mayo 18, mismo si Emily ang nag-tudlo sa mga militar nga amo ang nagpatay sa iya utod kag ginikanan, sa rason nga dugay na ang mga ini may nagakabaton nga intimidasyon bangud sila ang gina-suspetsuhan nga mga miyembro sang New People’s Army (NPA).
Sa piyak nga bahin, para naman kay 3rd Infantry Division public information head Lieutenant Colonel J-Jay Javines, e-tugyan nalang nila ang desisyon sang kaso sa Korte sa Pilipinas, sa diin may yara sang isa ka gina-alegar witness nga nagatudlo sa New People’s Army (NPA) sa pag-patay.*
