GIBALIK sulod sa kampo sa General Santos City Police Office (GSCPO) ang lima ka pulis gikan sa presinto human gilambigit sa iregularidad sa usa ka police operation, nakalabay nga semana.
Gipailawom sa imbestigasyon ang mismong hepe sa fatima police station nga si Police Major Lemuel Enrijo ug upat ka sakop sa presinto, dungan sa reklamo sa kabanay sa nasikop nila atol sa drug buy bust operation. Dugang ni Police Col. Nicomedes Olaivar Jr., Office incharge sa GSCPO wala kini nagkulang og pahimangno sa mga sakop nga sundon ang balaud kalabut sa mga ilusad nga police operation.
Una nang, gibutyag ni Police Major Riza Hernaez, labaw sa Regional Public Information Office sa Police Regional Office – 12 nga padayong ginarebyu nila ang kampanya batok gidiling droga. Nakalabay’ng semana, gikwestyon sa pamilya sa usa ka lalaki ang pagdakop sa sakop sa maong presinto sa ilang kabanay.
Sa gipadalang menseha sa social media page sa Brigada news- GenSan natingala sila nganung gidakop ang ilang kabanay nga si alyas Wangyu. Gidakop lang sumala pa kini nga walay search warrant o warrant of arrest ug dihang nasayran nila tua na kini sa presinto dunay bun-og ug gikaengong nakuhaan og putos sa gituohang shabu. I Richel Gubalani