Ginapahauman eon ro uman nga pagbalik it implementasyon it Gobyerno Sa Baryo (GSB) Program makarung dag-on.
Base sa direktiba ni Aklan Governor Joen Miraflores, nagpatigayun eon it meeting ro Provincial Governor’s Office – Special Projects Division kung siin nagtipon ro mga representante it sari-sari nga opisina ag ospital it provincial government para tun-an ro mga tikang sa uman nga pag-implementa it nasambit nga programa.
Kaeakip sa mga gintalakay hay ro mga serbisyong igapatigayun, target nga barangay, mga benepisyaryo, mga empleyado ag iba pang kinhangeanon nga logistics.
Hugot man nga ginatutukan ro pagpatuman it minimum health protocols sa nasambit nga aktibidad.
Matandaan nga ro Gobyerno Sa Baryo o GSB Program hay sambilog sa mga naging prayoridad nga programa ni dating Gov. Florencio Miraflores, pero napundo eamang raya bangud sa pandemya nga tuga it covid-19.
Pinaagi kara, ro mga serbisyong medikal, dental, sosyal, agrikultural, legal, ag iba pang mga serbisyo hay ginadaea it gobierno probinsyal sa mga barangay sa tinutuyo nga maihatud it direkta ro bulig ag serbisyo nga para sa tawo. / ANN DESLENE SALAZAR
