PATAY sa shootout ang gikaengong ‘trigger man’ sa pipila ka insidente sa pagpamusil-patay sa GenSan. Human nakigpinusilay sa kapulisan sa checkpoint sa Purok Udagre, Barangay Conel ning dakbayan Lunes sa kadlawon.
Matud ni PLt. Clarizel Perez, tigpamaba sa GenSan City Police Office (GSCPO) gisuta pa nila karon kung miyembro sa gun for hire. Ang napatay nga si Rosauro Serrano, 44-anyos, taga Barangay Katangawan, ang naila base sa usa sa IDs nga nakuha sa kapulisan.
Gipailawom na sa ballestic examination ang mga basiyo sa bala gikan sa .45 kalibre nga pusil nga gigamit ni Serrano sa pakigpinusilay. Naglaom si Perez sa paggula sa resulta sa eksaminasyon aron mahatagan og pagpaklaro ang serye sa pagpatay sa siyudad.
Gibutyag ni Lt. Danny Balofiños, deputy station commander sa San Isidro Police Station nga misulay og ikyas sa checkpoint si Serrano. Gipabuthan sumala pa ni Serrano og una ang mga pulis, igo lang mibalos og buto ang mga pulis nga miresulta sa kamatayon niini.
Nakuha usab sa kapulisan ang mga IDs kang Serrano nga dunay managlahing pangalan. Samtang pag-adto sa Brigada News team sa punerarya, wala pa ang pamilya sa pag-claim sa patay’ng lawas sa napatay. I Richel Gubalani
