WALAY nahitabong panic buying sa mga medical oxygen sa dakbayan sa Gensan tungod anaay igo nga suplay, kana ang gikompirma ni Vancouver Tan ang General Manager sa Gensan Industrial Compressed Gas Corporation (GICGC) ang nag-inusarang manufacturer sa mga medical gas oxygen sa tanang ospital sa dakbayan.
Adunay dakong kalahian sa demand sa mga oxygen milabay nga tuig ug sa kasamtangan nga panahon.
Sa tuig 2020 anaa lang sa 150 nga tangke ang gina-manufacture sa maong kompanya matag adlaw apan tungod sa nagataas nga kaso sa COVID-19 diin nagpabilin usab ang pandemya sa kasamtangan nga tuig misaka kini sa 350 tangke matag adlaw ang gina-manufacture sa kompanya alang sa mga nagkadaiyang ospital sa dakbayan nga nagapalit og medical oxygen.
Gipaniguro usab sa pamunuan sa Gensan Industrial Compressed Gas Corporation nga igo ang ilang suplay sa mga oxygen tank bisan sa nagataas nga demand ug daghan nga mga ospital ang nanginahanglan.( Enamie Mogpon)
