KUMBINSIDO ang labaw sa kapulisan nga dunay ‘gun for hire’ nga nalihok sa GenSan. Kini dungan sa pagpamusil-patay kang Jayson Dultra atong Domingo nga gikaengong miyembro sa ‘gun for hire’ sa siyudad.
Matud ni Police Col. Nicomedes Olaivar Jr., director sa GenSan City Police Office (GSCPO) kini ang rason sa pagpakusog nila sa operasyon batok loose firearms. Dugang ni Olaivar Jr., usa sa rason sa lagsik nga operasyon sa mga miyembro sa ‘gun for hire’ mao ang halapad nga problema sa land conflict sa GenSan.
Una na usab giangkon ni Konsehal Richard Atendido, chairperson sa committee on Peace and Order sa konseho nga bisan siya ang kumbinsido nga dunay ‘gun for hire’ sa siyudad. Si Dultra ang gitudlo sa kapulisan sa pipila ka insidente sa pagpatay nakalabay’ng tuig sa siyudad. I Richel Gubalani
