GIANUNSYO ni Brigada Group of Companies Chairman/CEO Elmer V.Catulpos ang planong paghatag sa kompanya og duha ka adlaw nga day off alang sa iyang mga empleyado.
Sa selebrasyon sa 17th year anniversary nga gipahigayon sa KCC Convention and Events Center, gibutyag ni Catulpos ang maong plano nga nakadawat og kusog nga pagpamakpak gikan sa mga empleyado.
Pagpaklaro niini nga kinahanglan usab nga may igahin nga igong panahon ang mga empleyado sa ilang pamilya dili lang usa ka adlaw apan duha, Sabado ug Dominggo.
Ang duha ka adlaw nga day off segun ni EVC ang bayran usab sa kompanya ug kuhaon matud pa ang bayad gikan sa ginansya sa mga produkto sa Brigada sama sa ginatampo ngadto sa mga miyembro sa Brigadahan.
Dugang pa ni Catulpos nga dungan sa paglusad sa Mother and Child advocacy nationwide atol gihapon sa anibersaryo sa Brigada, nasuta nga kinahanglan ang igong pag-atiman sa ginikanan ngadto sa ilang anak ug mahimo kini kung may dugang oras o panahon nga gigahin.
Mahinungdanon matud pa kini aron mutubo mga bata nga puno sa inspirasyon, kadasig ug pagkugi nga hinunngdan aron sila mahimong mapuslanon sa katilingban, makatabang sa ekonomiya sa umaabot nga adlaw.
Apan labing mahinungdanon usab ang pag-amoma diha pa magsugod sa sabakan sa inahan gikan sa 1 day hangtud 1,000 days before sa paghimugso aron mudako nga mahimsog, ug mudako nga luwas sa sakit segun sa datos nga gipaambit ni EVC gikan sa World Health Organization ug Department of Health. I Joseph N.Reyes
