Evacuation center sang Kabankalan-DRRMO nahamtang sa flood-prone area?

-Reymund Titong

KABANKALAN CITY, Negros Occidental — Sa tion kun mag-bubo na ang madamol nga ulan bangud sang pagsulod sang La Nina phenomenon, ukon tig-ululan, paano kun ang evacuation center lakip na ang opisina sang Disaster Risk Reduction Management Office (DRRMO) sang syudad, ang yara sa flood-prone area?

Sa datus nga nakuha sang Brigada News FM-Kabankalan sa GeoRisk, nga gina-manage sang Department of Science and Technology (DOST), ang Barangay 4, kun sa diin na hamtang ang DRRMO sang Kabankalan ang na geo-tagged nga “moderately prone” ukon may tyansa nga bahaon, sa tion nga may bagyo ukon grabe nga pag-ulan.

FLOOD-PRONE. Ang may duag amo ang sakop sang Barangay 4, sa diin na hamtang ang DRRMO sang Kabankalan nga na geo-tagged nga “moderately prone” sa baha. [Flood data (DENR-MGB, 2018)]

Kun basehan ang report, paano nalang maka respondi ang mga katapo sang DRRM kun pati ang ila opisina kag kagamitan, may tyansa nga malubog sa baha?

Pahayag ni Kabankalan City mayor Benjie Miranda, may plano na ang syudad nga magbakal sang 10 ektaryas nga duta, sa mas mataas nga lugar kag malayo sa posibilidad nga ma-lubog sa tubig baha, pananglitan nga grabe ang pag-ulan.

Apang, wala pa may nasambit ang alkalde kun sa diin mismo sa syudad plano nga igapahamtang ang bag-o nga evacuation center kag opisina sang DRRMO.

Dugang pa sang alkalde nga ang ginlantaw nga bag-o nga evacuation center ang posibli man mangin sports and cultural center, sa diin pwede pagahiwaton ang nagkalain-lain nga mga aktibidad sang syudad.

Ang pagkahamtang sang DRRMO sa flood-prone area ang ginalantaw sang pipila ka pumuluyo nga sablag sa pagpatigayon sang rescue operations sa tion nga mag BAHA sa lugar, apang ang pagtransfer sini amo naman ang nagakadapat nga himuon.*

Leave a Reply

Your email address will not be published. Required fields are marked *