Arestado ang usa ka empleyado sa Davao City Veterinarian’s Office sa gipahigayong drug buy-bust operation didto mismo atubangan sa Davao City Hall Annex, kagahapong adlawa pasado alas 5:00 sa hapon.
Giila sa Talomo Police Station ang dinakpan nga si Arnel Enciso Bioco, 39 anyos, contractual employee sa nasangpit nga buhatan, ug residente sa Sto. Niño, Brgy. 74-A Matina Crossing, Davao City.
Nakuha sa dinakpan ang pakete sa gituohang pinaugang dahon sa marijuana, buy bust money, ug cellphone nga matud pa gigamit sa transaksyon.
Giila usab ang suspek isip top 6 sa regional level sa drug watchlist sa PNP ug PDEA XI.
Kasong pagsupak sa R.A. 9165 kun Comprehensive Dangerous Drugs Act of 2002 ang atubangon sa dinakpan.
