Nangin mainit ang pagbaton sang mga Capizeño, ilabi na sa mga katapo sang lokal nga mga ospital kag ahensya sang ikaayong lawas sa pinakabag-o nga sistema nga magapahapos kag magahimo sistematiko sang pag-imbentaryo.
Opisyal na nga ginlunsar sa Capiz, nga amo ang napilian nga mangin una sa tanan nga probinsya ang ELECTRONIC LOGISTICS MANAGEMENT INFORMATION SYSTEM ukon eLMIS nga pagagamiton sang DOH bilang opisyal nga software nga magarecord sang tanan nga mga medical equipments kag bulong sa mga Ospital indi lamang sa Capiz kundi pati man sa bug-os nga pungsod.
Ini nga tikang ang suportado sang Department of Heath kaupod ang USAID, isa ka independiente nga ahensya sang Amerika nga nagasuporta kag nagabulig sa mga nagkalain-lain nga nasyon agud mabatuan ang kaimulon kag kalamidad.
Ang ini nga pagbag-o ang ginalauman nga magapa-umwad sang aton naangdan nga pama-agi sa dokumento sang mga equipments kag bulong.
Bangud diri, nagapasalamat gid si Governor Fredenil Castro sa USAID kag DOH sa pagpili sang Capiz nga mangin una nga probinsya nga magapatuman sini nga pagbag-o.
Lakip man sa ginpa-abot sang Gobernador sa DOH amo ang iya balatyagon sa wala pa matapos nga building sa RMPH sa Lanot, nga sa iya mga tinaga “The World’s Biggest Hospital” kay dose na katuig ang nakaligad, hasta sa karon wala pa guid mahuman.
Ginpasiguro naman ni USEC Maria Carolina Taiño nga iya personal nga iga pa-abot nga makasulod sa 2024 budget ang pagpahuman sang nasambit nga opital. Nagtambong man sa okasyon sanday Vice Governor James “Mitang” Magbanua, Board Member Thea Faith Reyes, Board Member Sony Besa, Board Member Cecilio Fecundo, Board Member Blesilda Almalbis, Roxas City Ronnie Dadivas, Dumarao Mayor Matt Hachuela, Maayon Mayor Raymond Malapajo, Sigma Mayor Dante Eslabon, Pontevedra Mayor Henry Tumlos, Pilar Mayor Arnold Perez, mga katapo sang Capiz PHO sa pagpanguna ni Dr. Alex Nolasco, mga representante sang DOH sa kada probinsya sang rehiyon, mga doktor sa nagkalain-lain nga ospital sa syudad kag probinsya kag iban pa nga mga stakeholders.
