Nag angkon it pilang nina sa kaeawasan ro sangka eaeaki matapos rayang bun-on sa Brgy. Unidos, Nabas, Aklan.
Ginkilaea ro biktimang si Edgar Mark Alvarez 29yo ag residente it Brgy. Gibon, Nabas samtang ro daywa ka suspek hay ginkilaea nga sanday Jerold Guantia Berondo, 27 anyos ag Kier Pioquinto Berondo, 25 anyos ag parehung residente it Brgy. Unidos, Nabas, Aklan.
Sa imbestigasyun, pauli eon ro biktima ag mga kaibahan kara halin sa sangka baylihan sa Brgy. Unidos kat makita ro mga suspek kung siin, kat may nag agi nga sangka motorsiklo hay nagsinggit segun ro suspek nga si Kier nga “bangga-e”.
Sinabat man segun raya it biktima nga “di bangga-e”.
Dikara ag nag gabot it kutsilyo ro suspek nga si Jerold ag ginbuno ro biktima.
Nakadaeagan pa ro biktima pero gin-eagas gihapon raya it mga suspek ag ginbuno.
Insigida man nga dinaea sa Ibajay District Hospital ro biktima samtang naaresto man ro suspek nga si Jerold ag nakumpiska sa anang posisyon ro kutsilyong ginamit kara sa pagbuno.
Samtang, naaresto man ro suspek nga si Kier sa ginpatigayun nga hot pursuit operation.
Sa kustodiya eon makarun it Nabas MPS ro mga suspek para sa nagakaigu nga disposisyon. / ANN DESLENE SALAZAR
