LEGAZPI CITY – Nagpaparahay na ngunyan an duwang pulis na nalugadan makalihis na magresulta sa armadong engkwentro an pig-implementar na search warrant sa Brgy. Basicao Coastal, banwaan kan Pio Duran, Albay kasusaro.
Binisto an mga ini na sinda PCpl. Junnel Cupin Campomayor kan 9SAB, SAF asin PCpl. Carl Madrigal Gratela kan CIDG-Albay PFU. Mantang nagre-recover sa Bicol Regional Hospital and Medical Center, ginawadan sinda kasuudma kan Philippine National Police Bicol nin mga medalya, partikularmente an Medalya ng Sugatang Magiting asin Medalya ng Kadakilaan.
Sa intrevista kan Brigada News FM Legazpi kay PNP Bicol Regional Director PBgen. Andre Dizon, sinabi niya na tinao sainda an mga medalya komo pagbisto sa sainda huli ta nagin heroe an mga ini.
Apwera kaini, labi man an pagpapasalamat ni Dizon sa BRHMC huli sa dekalidad na serbisyo na itinao kaini sa mga pulis na nagsapar ki mga lugad sa saindang hawak.
