KABANKALAN CITY, Negros Occidental — Wala napatuman ang price freeze sa mga nagapanguna nga balaklon sa syudad sang San Carlos, apisar nga nag-deklarar na ini sang state of calamity.
Suno kay DTI Negros Occidental provincial director Lynna Joy Cardinal, wala na lakip sang nasambit nga syudad sa gin-patuman nga price freezing, bangud sa gina-alegar kapaslawan sang syudad nga mahatagan sang kopya ang Department of Trade and Industry (DTI) sang deklarasyon nga gin-paidalum ini sa state of calamity.
Katuyuan sang price freezing amo ang pagsiguro nga ang mga nagapanguna nga balaklon kaangay sang sardinas kag noodles, ang naga-pabilin nga abot-kaya sa mga pumuluyo, samtang yara sa ang isa ka lugar naga-atubang sang isa ka dako nga krisis.
Ginpatuman na ang price freeze sa tatlo ka mga local government units sa probinsya nga gina lakipan sang syudad sang Kabankalan, kag banwa sang San Enrique kag Valladolid. Base sa Republic Act 7581 ukon ang Price Act, gina-patuman ang price freeze sa sulod sang 60-diyas humalin sa adlaw sa pag-deklarar sa isa ka LGU nga yara sa idalum sang state of calamity.
Samtang, suno kay Cardinal, agud masiguro nga ginatuman sang mga mga establisyemento ang price freeze, may pagapatigayunon sila nga daily monitoring sa tatlo ka mga lugar sa probinsya.
Sa piyak nga bahin, nagapadayon man sa gihapon nga naga-singgitan ang mga pumuluyo nga ulo-aligmaton sang yara sa pwesto ang promisa nga paga-nubuan ang presyo sang bugas sa pungsod Pilipinas.*
