KALIBO, AKLAN—Ginpasiguro it Department of Social Welfare and Development (DSWD) 6 nga insigida nandang madalion do pagpaguwa it bulig pinansyal sa mga apektadong pamilya ag indibidwal sa mga lugar nga una sa idaeom it Enhanced Community Quarantine (ECQ).
Ginpahayag ni Regional Director Ma. Evelyn B. Macapobre, dueongan nga iga-release do ayuda agud nga madasig mabaton it mga tawo do bulig nga igapaagi sa idaeom it Assistance to Individuals in Crisis Situation (AICS) program it nasambit nga taeatapan.
Target man it DSWD nga mataw-an it 665,561 do pamilya nga makabaton it tag-P1,000 do kada indibidwal ag maximum nga ap-at katao eang sa sangka pamilya do cover it cash aid.
Sandig sa guidelines, do priority target beneficiaries it special AICS hay do mga indibidwal ag pamilya nga eubos nga naapektuhan bangud sa pagdeklara it localized ECQ sa andang mga lugar kung siin kaibahan kara do mga pamilya nga dating naeakip sa Social Amelioration Program (SAP) sa idaeom it Bayanihan 1; benepisyaryo it emergency subsidy sa idaeom it Bayanihan 2; indibidwal nga una sa vulnerable groups kapareho it mga nagaisahanon nga nagakabuhi, senior citizens ukon Persons with Disability (PWD) ag do mga stranded nga indibidwal bangud sa trabaho sa probinsya, siyudad ukon munisipalidad nga ginpaidaeom sa ECQ.
Kung madumduman, sa Region 6, do Iloilo City ag Iloilo Province do ginpaidaeom sa ECQ hasta sa katapusan it buean. // SHERRY ANNE REUNIR-VIDAL
