KORONADAL CITY – KOMITADO ang Department of Social Welfare and Development o DSWD-12 sa paghahatid ng kinakailangang social assistance para sa mamamayan ng SOCCSKSARGEN.
Mismo si DSWD-12 Regional Director Director Loreto Jr. V. Cabaya ang nagpasiguro na makakaasa ang publiko na hindi magdadalawang-isip ang kanilang opisina sa pagbibigay ng interventions para sa ika-uunlad ng bawat isa.
Inihayag ni Cabaya, Jr., na nasa 228, 441 lahat ang family beneficiary ng Pantawid Pamilyang Pilipino Program o 4Ps sa buong Rehiyon-12.
Dagdag ng opisyal na ang SOCCSKSARGEN ang may P5.5 billion budget para sa pagpapatupad ng isa sa mga pinakamalaking social protection program ng rehiyon para ngayong taon.
Dagdag ng opisyal, na nasa 43,796 self-sufficient families ang nakapagtapos na sa programang ito sa pamamagitan ng Pugay Tagumpay ceremony simula noong 2023 hanggang 2024.
Binigyang-diin ni Cabaya, na ang pagpapatupad ng 4Ps ang magpapatuloy na tumulong upang mapaibayo ang pamumuhay ng mahihirap na mga pamilya sa Rehiyon-12.
