Malampusong nabungkag sa otoridad ang usa ka drug den atol sa gikasang anti-illegal drug operation sa Purok 2, Brgy. Bonbon, dinhi sa dakbayan sa Butuan bandang alas 6:30 kagabie.
Sa taho sa Philippine Drug Enforcement Agency kon PDEA 13, nagsilbi sila og search warrant gumikan sa illegal nga droga batok sa subject person nga miresulta sa pagkasikop sa usa ka drug den maintainer nga si Ryan Napalla lakip na ang mga bisita sa iyang panimalay nga sila Daniel Verato, Christoper Singson, Domingo Planco ug Lloyd Arcilla.
Gisilbi sa hiniusang pwersa sa otoridad nga gilangkuban sa PDEA 13 inubanan sa Butuan City Police Station 3 ang search warrant sa panimalay ni Napalla nga miresulta sa pagka-kompiska sa unom (6) ka transparent plastic sachets nga dunay sulod nga gidudahang shabu nga dunay gibug-aton nga 15 gramos ug ubay-ubay nga mga drug paraphernalia.
Kasong pagsupak sa Section 6, 7, 11 ug 12, Article 2 sa Republic Act 9165 kon Comprehensive Dangerous Drugs Act of 2002 ang ipasaka batok sa mga nadakpang suspek.
