Nilinaw ng Department of Justice na hindi illegal ang pag-aalok ng reward money para mahanap si pastor Apollo Quiboloy.
Ito ay matapos na kwestyunin ng ilang opisyal ng Kingdom of Jesus Christ ang pag-aalok ng Department of the Interior and Local Government ng P10 milyong pabuya sa makakapagturo sa kinaroroonan ng puganteng pastor.
Binigyang-diin ni DILG Sec. Benhur Abalos, na hindi siya nag-solicit para sa reward money at ito ay tulong lang para mahuli si Quiboloy.
Ayon kay Justice Usec. Nicolas Felix Ty, hindi ipinagbabawal sa batas ang pag-aalok ng reward para mahanap ang isang akusado at maiharap ito sa korte.
Giit pa niya na trabaho ng justice sector na ipatupad ang mga criminal law at hindi nila ito magagampanan kung hindi nila mahahanap ang mga akusado.
Matatandaang nahaharap si Quiboloy at limang iba pa sa kasong child abuse sa Davao City court habang naglabas naman na ang Pasig City Court ng warrant of arrest para kasong human trafficking.
