Nakikipag-ugnayan ng Department of Health (DOH) sa Department of Finance (DOF) para sa pagpapatupad ng exemption ng ilang gamot mula sa value-added tax (VAT).
Tinukoy ni Health Undersecretary Charade Mercado-Grande ang ilan sa mga gamot gaya ng para sa hypertension, diabetes, at high cholesterol, kung saan simula noong January 2019, ang mga ito ay VAT-free na sa ilalim ng Tax Reform for Acceleration and Inclusion (TRAIN) law.
Samantala, sa ilalim naman ng Corporate Recovery and Tax Incentives for Enterprises (CREATE), sinabi ni Grande na ang mga gamot para sa management ng cancer, mental illnesses, tuberculosis, kidney diseases, at COVID-19 ay exempted narin mula sa VAT, simula sa January 2023.
Ang TRAIN na nilagdaan bilang batas noong December 2017, ay nagpapalawak sa VAT base at nagbabawas sa personal income taxes (PIT) simula noong January 2018. //MHEL PACIA-TRINIDAD
