BICOL – IPINUNTO ngunyan kan Department of Health sa Bicol na an ‘unhealthy diet asin lifestyle’ an parating rason kan pagkakaigwa kan sarong indibidwal nin man iba ibang non communicable diseases o NCDs.
Nagkapira sa mga helang na kabale digdi an kanser, diabetes, heart disease asin stroke o mga dai nakakaulakit na kamatean asin dai pwedeng mapasa sa ibang tawo.
Segun sa departamento an NCDs an inaapod man na chronic diseases o kondisyong pauru utro asin pang haluyan an epekto.
Base sa key statistics, pigkakarkolong nasa 41 milyonna mga tawo an nagagadan dahil sa NCDs kada taon.
17.9 million kaini an dahil sa cardiovascular disease; 9.3 million an dahil sa helang na kanser; 4.1 million sa helang sa respiratory system asin 1.5 million an dahil sa diabetes.
Mantang kabale man sa apat na nangengenot na klase nin NCDs sa nacion an cardiovascular diseases, cancers, chronic obstructive pulmonary diseases asin diabetes mellitus.
Ipigkokonektar sa pagkakaigwa nin mga helang na ini sa apat na ordinaryo alagad maiibitaran kutana an mga ‘risk factors’ siring kan kakulangan sa ehersisyo, paninigarilyo asin pag inom nin arak.
Pagiromdom kan ahensya, importante an pagkakaigwa nin aktibong pamumuhay urog ngunyan na panahon kun saen limitado an hiro kan mga tawo nin huli sa mga ipinapautob na restriksyon at pag iingat kontra sa nakakaulakit na covid-19 virus.
