Ipinaliwanag ng Department of Health (DOH) Bicol ang dahilan kung bakit ang mga bata o mga mag-aaral ang karaniwang nakakakuha ng hand, foot and mouth diseases (HFMD).
Ayon kay Dr. Jannish E. Alcala-Arellano, infectious disease cluster head, madaling makakuha ng HFMD ang mga mag-aaral dahil mahilig silang humawak sa iba’t ibang uri ng item sa paaralan.
Dahil dito, nagiging prone umano sila sa iba’t ibang uri ng sakit lalo pa’t kung hindi nababantayan nang maayos at hindi nakakapaghugas agad ng mga kamay.
Dapat aniyang matutunan ng mga bata, at dapat mabantayan silang mabuti na palaging magsanitize at magdisinfect ng mga kamay upang maiwasan ang pagkakaroon ng HFMD.
Kaya nga isa umano sa kanilang adbokasiya na sa bahay pa lamang ay natuturuan na ang mga bata patungkol sa proper hygiene.
Maliban pa rito, kapag mayroong sakit ang isang mag-aaral ay hindi na dapat na pinapapasok sa mga eskwelahan upang hindi na lumala at hindi na makahawa pa.
Sa ngayon, batay sa pinakahuling ulat mula sa ahensya at sa Albay PHO, mayroon nang 585 na mga kaso ng nasabing sakit sa buong rehiyon ng Bicol.
