BICOL – SUPORTADO kan Department of the Interior and Local Government o DILG-Bicol an ipinautob na “enhanced restriction” para sa mga dai pa bakunado kontra covid-19 sa National Capital Region (NCR).
Ginibo ni DILG-Bicol Regional Director Atty. Anthony Nuyda an pahayag kasabay an pangapudan sa mga lokal na gobyerno sa rehiyon na gumibo man nin kaparehong ordinansa.
Magigiromdoman na napagkasunduan kan Metro Manila Council (MMC) na magpautob nin resolusyon na maglilimita sa hiro kan mga “unvaccinated individuals” kasunod kan pagsasairarom kan rehiyon sa Alert Level 3 asin dara man kan Omicron Variant.
Base sa resolusyon kan MMC, ipagbabawal an pagluwas nin harong kan mga dai pa bakunado apwera sa pagbakal nin essential goods asin services. Dai man sinda tutugutan na mag-domestic travel asin mag-indoor o al fresco dining. Kinakaipuhan man nindang sumairarom sa RT-PCR Testing kada duwang semana antes maglaog sa saindang trabaho.
Nangapudan man an opisyal sa mga local chief executives na magsagibo nin re-orientation dapit sa COVID 19 asin sa bagong variant tanganing matawan nin tamang impormasyon an mga barangay health workers, mga tanod asin mga residente.
Dugang pa ni Nuyda, para man sa Philippine National Police (PNP), makakatabang an pagasasagibo nin regular na inspeksyon asin pagbisita sa mga quarantine hotels tanganing masiguro na higot na naipasusunod an mga protocols.
