LEGAZPI CITY – Masagibo nin online job training an Department of Information and Communications Technology (DICT) Bicol para sa mga Persons with Disabilities (PWDs) sa tabamg kan Albay Provincial Persons with Disability Affairs Office (APPDAO).
Segun kay Engr. Antonio B. Bonganay, Officer-in-Charge kan Technical Operations Division kan DICT Region 5, an pinakaprimerong obheto kaini an makabilog nin differently-abled online Filipino workers o freelancers sa probinsya asin matawan nin tyansa na magkaigwa nin kasanayan an mga PWD sa digital na trabaho.
An inisyal na oryentasyon para sa Digital Jobs Technical Training, pig-atinderan kan nagkapirang mga PWD hale sa Legazpi, Daraga, Camalig, Oas, Polangui, Manito, Tabaco, Malinao, asin Bacacay, Albay.
Sa pagtapos kan aktibidad, piglalaoman na makakakua nin kliyente an mga kabale asin tatawan man an mga ini nin pagbisto.
