SUKAD niadtong 2020, mitala na sa 100 ka mga magtutudlo ug non teaching personnel sa DepEd GenSan ang nataptan sa COVID-19.
Kini ang gikumpirma ni DepEd GenSan Schools Division Superintendent Romelito Flores, nga sa maong ihap sukad miaging tuig ug ning kasamtangang tuig, 80 na ang nakarekober ug duha ang namatay nga magtutudlo ug usa ka non teaching personnel sa managlahing bulan ug petsa sukad 2020 hangtud karong tuig 2021.
Dugang niini, sa kasamtangan mokabat sa 16 pa ang aktibong kaso asa walo ang anaa sa isolation facility, unom ang naka-home quarantine ug duha ang admitted, asa kasagaran matud pa sa aktibong kaso ang asymptomatic.
Alayun niini padayun gihapon ang gipatuman nga alternative work arrangement asa dili tanan gaadto sa tulunghaan ingon man ang pagpatuman sa pharmaceutical interventions.
Dugang ni Flores anaa usab ang Kaagapay program sa DepEd GenSan nga gilusad miaging tuig nga mohatag og tabang bisan ginagmay sa mga nataptan sa COVID-19.
