DepEd Bicol, liwat na pigparumdom an dakulang parte kan mga magurang sa pagkanuod kan mga kaakian na magbasa asin magsabot

LEGAZPI CITY – Liwat na pigparumdom kan Department of Education (DepEd) Bicol an dakulang parte kan mga magurang sa pagkanuod kan mga kaakian na magbasa asin magsabot.

Ini an segun kay DepEd Bicol Regional Director Gilbert Sadsad, katakod kan nairehistrong porsyento kan mga kaakian na nagtenir sa pagigin full refresher asin emerging o mga dae pa tatao magbasa asin magsabot kan nagtalikod na school year, dawa na an mga ini ipiniaagi sa 8-week learning recovery curriculum, kun kaya saiyang tinawan-duon na pakatapos kan klase sa eskwelahan dapat may follow-up na pagturo an mga magurang na isagibo sa harong.

Dugang pa ni Sadsad, dae dapat subuot magin rason an pagigin busy pirmi kan mga magurang, asin dapat igwa nin itagamang oras sa mga aki pag-abot sa pag-adal asin dapat man na namomonitor an mga ini dawa sa paggamit nin gadget nganing mas madali an mga ini makanuod.

Kun magigirumduman, sa datos kan ahensya sa probinsya kan Albay, makalihis na isaagi sa Modified Comprehensive Rapid Literacy Assesment an labi 50,000 mga estudyante sa Grade 1 to 3 sa pagpuon asin pagtapos kan school year 2024-2025, nakapagrehistro nin 7.56% na nagtenir na full refresher pagabot sa letter sounds, rhyming words asin sentences reading, mantang igwa man na natadang 10.41% na konsideradong emerging sa reading fluency and comprehension.

Leave a Reply

Your email address will not be published. Required fields are marked *