NIUBOS ang demand sa mga karneng baboy sa merkado publiko sa Dakbayan sa Lapu-Lapu.
Matud ni Lapu-Lapu City Public Administrator Maria Elena Caballes nga ang maong epekto nahitabo sukad nga na-detect ang unang kaso sa African swine fever (ASF) sa dakbayan sa Carcar sa probinsya sa Sugbo niadtong Marso 01, 2023.
Si Caballes miingon nga ang gidaghanon sa mga baboy nga ihawon niminus usab, tungod sa kagamay sa suplay.
Hinuon, siya miingon nga ang presyo sa baboy nagpabilin nga stable.
Siya nipasalig sa publiko nga ang baboy nga gibaligya sa mga merkado sa dakbayan gikan sa mga suppliers sa amihanang Sugbo, dili sa habagatan diin nahimutang ang Carcar City.
Siya niingon nga mayoriya sa mga suppliers gikan sa mga lungsod sa Consolacion, Compostela, Tabuelan, Tuburan, ug mga dakbayan sa Bogo ug Danao.///Michelle Craste
