Hugot nga gikondena sa Davao City Police Office ang nahitabong pagpamusil sa kanhing Mayor sa Lungsod sa Cateel, Davao Oriental sa milabay’ng adlaw human kini namahaw sa usa ka fastfood chain sa Km5 Buhangin ning dakbayan sa Davao.
Miapela sab ang DCPO sa publiko kung ugaling dunay impormasyon nga makuha, gilayong mureport sa kapulisan aron nga kahimoon og aksiyon sa otoridad. Dako sumala pa kining tabang aron nga makab-ot ang hustisya sa mga nabiling pamilya sa mga biktima.
Kahinumdoman nga patay si Giselo Velasco Castillones samtang samdon sab ang driver niini nga anaa na sa luwas nga kahimtang human napagan sa pagpamusil.
Gani, gilayong gilusad ang Special Investigation Task Group ‘CASTILLONES’ alang sa paspas nga kasulbaran sa maong kaso.
Nunot ning maong insidente, ang Davao City Police Office daling mihimo og follow-up sa pagpatay sa biktima ug nagpasiugda og mga counter operation aron mailhan ug masikop ang mga responsable sa krimen.
Gipang susi na sab ang CCTV footages duol sa nahitaboan ug gihimo na sa kapulisan ang tanang pamaagi aron nga masulbad ang kaso.
Samtang, gibutyag sab sa tigpamaba sa DCPO nga si PCapt. Hazel Tuazon nga dakong tabang ang makuhang impormasyon gikan sa mga kaubanan sa biktima nga sakay sa sakyanan atol sa pagpamusil, sa ihatag niini nga impormasyon.
Dugang pa PCapt. Tuazon nga daghang anggulo karon ang ilang gilantaw sa posibleng hinungdan sa krimen.
