Naninahan ro daywa ka eaeaki matapos eab-on kabii sa may Oyo Torong St., Kalibo, Aklan.
Ginkilaea ro mga biktimang sanday Elmer Villanueva 40yo ag Jaypee Zonio 36yo nga parehung residente sa nasambit nga lugar.
Sa report, samtang naga inuman ro mga biktima sa sangka baraka kaibahan si Omar John Torres 44yo nga residente it General Luna St., Kalibo, umagi si Ervin Natalio 32yo it Oyo Torong St., Kalibo sakay it anang topdown nga tricycle.
Dikara ag ginhambaean segun si Natalio ni Villanueva nga “dahan-dahan eang sa pagpadaeagan bangud maabung unga sa lugar”.
Umuli segun si Natalio ag pagbalik kara hay may daea eon nga kutsilyo pero naagaw kana raya nanday Villanueva ag Zonio rasun nga nag uli euman ro suspek.
Pero sa pangaywang kahigayunan hay bumalik ro suspek nga si Natalio nga may daea nga butcher’s knife ag owa it probokasyon nga gin-eabo sa abaga si Villanueva.
Nag-awat si Zonio pero gin-eabo man imaw sa siko.
Ro daywang biktima hay gindaea man eagi sa Aklan Provincial Hospital samtang ro suspek hay naaresto man it Kalibo MPS ag kulong eon makarun.
Ro kutsilyong may habang 13 inches nga naunang naagaw sa suspek hay nai-turn over eonman sa Kalibo MPS ni Omar John Torres. / ANN DESLENE SALAZAR
