-Reymund Titong
KABANKALAN CITY, Negros Occidental — Nag-luhob sang halos 2 ka metro nga dalan sa Purok Banga, Barangay Camingawan sa syudad sang Kabankalan, kaagahon sang Huwebes, Hulyo 18, bangud sang pagbubu sang mabaskog nga ulan.
Sa interview sang Brigada News FM-Kabankalan kay Judson Cabalatungan, operations and warning officer sang Kabankalan City Disaster Risk Reduction and Management Office (CDRRMO), iya ginapahayag nga ang pag-luhob sang duta nga naglab-ot sa duwa ka metro ang bangud sa tuman nga pag-ulan sa lugar kag pagsalupsop sang tubig nga nangin rason sang pag-humok kag pag-luhob sini.
Bangud sa natabo, pagatampukan sang CDDRMO ang nagluhob nga dalan agud mangin ‘passable’ ukun ma-agyan ini liwat sang mga dalagko nga mga salakyan. Sa karun, posibli na ma-agyan ang dalan, pero dapat sa giyapon mag ulualigmat, dugang pa ni Cabalatungan.
Sa piyak nga bahin, suno naman sa residente sa lugar nga si Jenelyn Dela Cruz, pasado las-12 sang kaagahon sang nagpundo ang rescue vehicle sang Barangay Carol-an, apang wala lang nila ginsapak sa rason nga basi may yara lang sang aksidente nga nagluntad sa dalan, bangud sa maulanon nga panahon.
READ: Siyam ka barangay sang Kabankalan, “highly susceptible” sa landslide
READ: 54.3% sang mga government health facilities sa Kabankalan, yara sa flood-prone areas
Matapos ang duwa ka oras, didto na kag ila nahibaluan nga ang rason sa pagpundo sang mga salakyan amo ang pagka-luhob sang dalan.
Madumduman nga sa ginpatigayon nga data analysis sang Brigada News FM-Kabankalan, siyam sa 32 ka mga barangay ang ma-konsiderar nga ‘highly susceptible’ ukon may dako nga tyansa nga may magluntad nga landslide, ini ang ginalakipan sang Carol-an, kag sin-sundan sang Orong, Oringao, Camingawan, Tan-awan, Tagukon, Locotan, Hilamonan, kag Camansi.*
