LEGAZPI CITY – Presente nang pigpeprepararan kan Albay Provincial Social Welfare and Development Office (PSWDO) an iba pang aktibidad sa probinsya na may kinaraman sa pagseselebrar kan Children’s Month ngunyan na Nobyembre.
Sa intrevista kan Brigada News FM Legazpi kay PSWDO head Maria Vivien Cea, sinabi niya na naenot na nindang ikinondusir kan Lunes an kick-off activity katakod kaini kasabay sa flag raising ceremony.
Sunod kaini an culminating activity sa Nobyembre 27 na ikokondosir sa Albay Astrodome na saindang pigpeprepararan ngunyan.
An nasambit na aktibidad aatendiran kan piling mga estudyante o mga aki sa probinsya.
Nakasentro sa reproductive health kan mga aki an tema asin pokus kan saindang aktibidad.
Sa culminating activity, magkakaigwa nin on the spot painting contest para sa mga talentadong aki.
Apwera kaini, may mga inimbitaran man sindang mga speaker na maheras nin mga kaaraman dapit sa tema kan mga kaakian asin may inimbitaran man sindang team sa PHO nganing magtao nin mga health services para sa sainda.
