PADAYON pa karon ang gihimong imbestigasyon sa kapulisan kalabotan sa paghapak og bato sa mga sumala pa tambay ngadto sa usa ka criminology student pasado alas-dos sa kadlawon, Setyembre 16 sa Poblacion, Compostela, Davao de Oro.
Ang biktima giilang si Jhon Lester Alibangbang, 18 anyos, criminology sa usa ka tulunghaan sa Compostela ug lumulopyo sa Brgy. Naboc, Monkayo, Davao de Oro.
Sa inisyal nga imbestigasyon, naglakaw lamang sumala pa ang biktima pauli sa ilang balay gikan sa usa ka kalingawan sa lugar sa dihang kalit kining giatangan sa mga batan-ong tambay ug sa walay pagduha-duha gibuno og dakong bato ang ulo niini rason nga nakuyapan ang biktima.
Paspas usab nga miikyas sakay sa motorsiklo ngadto sa wala matinong direksyon ang mga tambay human sa gibuhat niining krimen.
Dali sab nga gidala sa ospital ang biktima human nga nawad-an og panimoot ug napuno sa dugo ang dagway niini.
Nasayran nga ipailalom sumala pa sa operasyon ang batan-on human sa grabeng nahiagumang samad sa ulo.
Kasamtangan, naghanyag ang pamilya sa biktima og reward ngadto sa bisan kinsang makatudlo o makahatag og impormasyon sa mihimo sa ingon sa batan-on aron nga kahatagan og hustisya ang gidangatan sa ilang anak.
Gilantaw karon sa kapulisan ang anggulo nga dunay gipangulitawhan ang maong biktima nga duna nay hinigugma.
