Patay ro sambilog ka construction worker nga ginkilaea nga si Rexie Boy Blance, 36 anyos ag residente it Brgy. San Isidro, Jaro, Iloilo City matapos eamposan it pala ag gibuno it magmanghod sa Brgy. Bagumbayan-Ilajas, Alimodian, Iloilo.
Ro mga suspek hay ginkilaea nga kanday Alden ag Ardy Durban, mga residente it Brgy. Poblacion, Ajuy, Iloilo.
Base sa imbetigasyon it Alimodian Municipal Police Station, naga-inom samtang nagatan-aw it pelikula sa andang barracks ro biktima kaibahan ro iban pa nga mga indibidwal kat mag-abot ro hilong nga magmanghod nga suspek.
Nagreklamo si Blance bangud nasangagan segun raya sa motor it daywa ka suspek pero bangud dikara may natabo nga pagbaisay sa tunga it mga persona.
Bigla eun eamang nga gin-eamposan it pala ni Alden Durban ro biktima sa ueo rason nga madueaan raya it animo.
Ginhana man nga awaton ni Ramil Purillo nga kaibhan it biktima ro mga supek pero ginhanaan man imaw nga eamposan ni Alden pero nauna nga nakaeampos si Purillo it matig-a nga bakal kay Alden rason man agud madueaan raya it animo.
Bangud dikara, ro manghod nga si Ardy Durban hay nagbuoe it kutsilyo ag ginbuno ro uwa it malay nga biktima sa dughan rason it anang kamatayan.
Sa presente, nakadetain ro daywa ka akusado sa pulisya ag nagahueat it kaso nga ipasaka kuntra sa andang krimen./JIL B. LACSON
