Umaasa si House Deputy Majority Leader Erwin Tulfo na ire-retract o babawiin ni Senador Joel Villanueva ang mga binitiwan nitong salita hinggil sa pagkakaiba ng district at party-list representatives mula sa mga senador.
Ayon kay Tulfo, posibleng nadala lang ng emosyon si Villanueva kaya nito nailabas ang pahayag, ngunit aminado ito na nasaktan sila.
Nagkausap aniya ang mga miyembro ng party-list coalition sa Kamara kung saan ikinagulat nila ang statement ng kapwa mambabatas, lalo’t ang kaniyang ama ay kasama nila sa koalisyon bilang party-list representative.
Aminado ang kongresista na nainsulto sila sa naturang pahayag dahil binoto rin naman sila ng taumbayan.
Dagdag pa nito, kung tutuusin ay pareho lang na national level ang botohan sa mga senador at party-list.
Nagkataon lang na mas marami ang boto ng mga senador dahil nahati ang boto sa maraming party-list groups.
Hindi pa naman umano nakausap ng party-list coalition si CIBAC Party-list Representative Bro Eddie Villanueva hinggil dito.
