NAGHIMO na og mga pamaagi ang city public market administration aron nga mamintina ang kahinlo sa palengke sa GenSan.
Segun ni Lito Esclamado, city public market administrator nga nagpahigayon na sila og reorientation sa mga vendors ug mga sakop aron nga imintina ang kahinlo sa suporta sa ubang ahensya sa gobyerno.
Kini human usab sa bahad sa DENR- Environmental Management Bureau kun EMB nga basin mapasirado ang palengke kung dili masulbad ang problema sa waste water treatment facility.
Ang dinalian usab nga solusyon nga nahimo ang pag declog sa line canal padulong sa waste water treatment facility asa nakuha ang nagbara nga mga dagkong bato, buak nga bildo, nagkadaiyang foam ug uban pa.
Nagpahigayon og water flushing ang taga Bureau of Fire Protection aron mabanlas ang mga nagbara sa mga canal.
Sa pagtuman sa mga balaod sa pagprotekta sa tubig, hangin ug uban pa, hangyo ni Esclamado sa tanan nga magtinabangay lakip na sa CENRO nga matud pa maoy may kahibalo kalabot sa environmental protection.
Anaa na usab ang taga WMO nga naga monitor sa hustong pagtipig sa basura sa palengke.
Panawagan na lamang usab niini sa lokal nga panggamhanan nga ayuhon ang drainage system sa palengke ug sa poste nga may depekto ug kinahanglan ang retrofitting.
