Pinunan na an pagpapailaw sa Christmas Village sa Pugad Lawin Park sa banwaan kan Santo Domingo, Albay sa pangengenot ni Municipal Mayor Jun Aguas alas siyete nin pagkabanggi kasuodma.
Segun sa alkalde, mahamis asin maliwanag an pailaw bilang pagcelebrar sa maabot na kapaskuhan.
Mahihiling an makokolor na mga dekorasyon asin makusog na tanog kan tugtugan sa seremonya.
Mantang namamatean pa an raot kan panahon, dai nagin rason nganig dai ipadagos an pagpapailaw kun sain pig-atindiran ini ki dakol na mga tawo.
Nagpahiling man kan saindang mga talento an nagkapirang paratugtog, parabayle nganing magtao nin dugang na kaogmahan sa mga naghihiling.
Apwera ka ini, igwa man nin libreng taho na pigtao para sa mga nag-atendir.
Nagkaigwa man nin Christmas raffle an alkalde sa pigsagibong seremonya kun sain nagkaigwa nin tyansa an pirang nag-atendir na manggana nin manlain-lain na papremyo siring kan mga appliances partikularmente an brand new na refrigerator bilang major prize.
