KINASING-KASING ang pagdawat sa Blaan tribal leaders isip kabahin sa ilang tribo si Brigada Elmer Catulpos. Gihimo ang panagpulong sa Calatao, Barangay Tambler, Gensan kung asa gitambungan usab kini sa uban pang mga sakop sa ilang tribu.
Suot ni Catulpos ang traditional attire sa tribong Blaan og pormal nga giatubang niini ang mga tribal leaders og nakighinabi kalabutan sa pag adopt kaniya sa ilang tribu og mga kasabutan alang sa paglingkod ni Catulpos isip umaabot nga Mayor sa siyudad.
Dinhi nakakuha og higayon si Bong Fulong Baliwan nga mapadayag ang iyang gibati sa kasamtangang administrasyon. Sumala pa niini nga sulod sa 13 ka tuig ilang gisuportahan ang administrasyon sa siyudad apan wala matud pa sila gihatagan og pagtagad sama sa wala pag protekta sa ilang katungod isip usa ka tribu.
Naglaom sila nga sa pag lingkod ni Catulpos mamahimong mabalik ang ilang pag salig sa gobyerno nga sila pagaprotektahan ug mabago ang sistema sa siyudad. Pormal nga gideklara ni Bong Fulong Baliwan ang ilang hugot nga pag suporta kay Brigada Elmer Catulpos. Gipanawagan usab niini ang iyang mga katribu nga suportahan siya ug ang partidong AIM.
Nanawagan usab si Datu Eleazar Gulada ang tigapamaba sa IP sector ngadto sa tanang botante nga tribong Blaan nga mugawas sa umaabot nga Mayo 9 alang sa pag boto aron hatagan og pag hukom ang mga kandidatong nagpapili isip opisyal sa siyudad ug angayang hunahunaon nga sagrado ang ilang mga boto. Pormal usab nga giindorso ni Datu Gulada ug sa tibuok Futos Kalong Clan sa Brgy. Bawing si Catulpos o gitawag nilang si Bong Folung Atmabang.
Pinaagi sa Alemb o sonata gipadayag ni Chieftain Rolly Saya ang iyang pag suporta kay Catulpos. Sumala pa niini ang buot ipaabot sa iyang pag awit mao ang pag hangyo sa liderato ni Catulpos nga makaangkon og malambuon ug hapsay nga programa sa gobyerno ug aron nga mahatagan sila og pagtagad og kung unsa man ang ilang mga mulo dili sila pasagdan.
Kinasingkasing usab ang pagpasalamat si Brigada Elmer Catulpos ngadto sa tribong Blaan ug sa ilang mga tribal leaders sa pag dawat kaniya nga mahimong opisyal nga kabahin sa ilang tribo ug gihatagan niya kini og pag-ila ug gikonsiderang dakong pundasyon nga makangkon og maayong relasyon ang matag-usa.
Human ang panagpulong pormal nga gipahigayon ang covenant signing pinaagi sa ritual o tradisyon nga paggamit sa dugo alang sa pagsilyo sa namugnang kasubatan.
