LEGAZPI CITY – Kinumpirmar kan Municipal Disaster Risk Reduction and Management Office (MDRRMO) Pio Duran, Albay na igwang nagadan sa saindang banwaan kan nakalihis na Domingo durante sa kagat nin ayam na may rabies.
Sa intrevista kan Brigada News FM Legazpi kay MDRRMO head Noel Ordoña, sinabi kaini na menor de edad an biktima asin pagsadiri ninda an ayam na nakakagat.
Segun kay Ordoña, an mamundo digdi, kan Disyembre 10, 2023 pa nakagat an biktima alagad dai man inireport kan mga magurang sa mga otoridad asin barangay.
Naaraman na sana su boot ninda an dapit digdi kan dinara sa ospital an biktima ngunyan na Enero huli ta pigkakalintura asin nagpapahiling ki sintomas nin rabies siring kan takot sa tubig asin paros.
Sinabi niya, saka pa sana nakumpirmar kan health authorities kan banwaan na rabies an ikinagadan kan biktima.
Kaya, segun kay Ordoña, kan nakalihis na Lunes, nagbilog an lokal na gobyerno sa pangengenot ni Mayor Alan Arandia ki team na kumpwesto nin rural health unit, Agriculture’s Office asin an MDRRMO nganing imbestigaran an insidente.
Asin napag-araman na narungaw an ayam asin kadakol nang mga kinaragat siring kan mga kapwa ayam asin manok.
Apwera pa kaini, naaraman man na binuruno an ayam asin pinurulutan.
Mientrastanto, resulta kan saindang contact tracing, nasa 15 katawong persons of interest an pigmo-monitor asin kaipuhang tudukan ki kontra rabies, alagad harabo kan mga ini magpabakuna huli ta wara su boot sindang rabies.
Sa ngunyan, nagpapadagos an saindang lakdang nganing mabakunahan an mga ini.
