Nagtukod ang gobyerno probinsyal sang Capiz sang isa ka foundation nga amo ang magadumala sa mga masunod nga selebrasyon sang Capiztahan.
Ini ang nangin pahayag ni Governor Fredenil Castro sa ginhiwat nga press conference sa sulod sang kapitolyo sang nakaligad nga inadlaw.
Suno pa sa opisyal,nga ang pagtukod sang Capiztahan Foundation isa ka maayo nga tikang agud indi malaktan sang pamulitika kag indi man ini luyag nga politiko ang magadumala sa tuigan nga selebrasyon sa Capiz.
Dugang pa ni Castro, nga naka-eleher na ang amo nga grupo sang ila presidente sa ngalan ni Mr. Neri Bubbles Ong kaupod ang mga prominente nga kabataan kag mga negosyante.
Pinaagi sini, mangin tayuyon kag mahatagan sang husto nga direksyon ang nasambit nga okasyon kag sa masunod pa nga administrasyon.
Ginpasiguro man sang gobernador, matapos ang subong nga tuig nga Capiztahan, igalunsyar ang nasambit nga foundation kag ang madason nga sistema sang selebrasyon.//KMD Gicalde
