Reymund Titong
KABANKALAN CITY, Negros Occidental — Humalin sa isyu nga wala sang Environmental Compliance Certificate (ECC) ang P2 billion palm oil project sa banwa sang Candoni, padulong naman sa biolasyon sini nga illegal quarry.
Sa eksklusibo nga dokumento nga nakuha sang Brigada News FM-Kabankalan, nag-issue sang notice of violation ang Provincial Environment and Management Office (PEMO) sang Oktubre 15, batok sa Hacienda Asia Plantation Incorporated (HAPI) matapos may gina kut-kut nga duta ang kompanya nga wala sang permit.
Sandig sa Monitoring and Investigation Report sang PEMO sang Oktubre 2, didto na diskubrehan nga ang gin kut-kut nga duta ang may kadalumon nga ginabulubanta tatlo ka metros, kag nagalapad na sa 1,658 square meters.
Ginbayolar sang kompanya ang Provincial Mining Ordinance No. 2023-001 Article-001, suno sa PEMO.
Pahayag naman ni Jimmy Debuyan, community relations officer sang HAPI, ang duta nga ila gin kutkut ang ila ginagamit sa paghimo sang dalan sa sulod sang masubra 6,000 ka ektarya nga sakop sang Integrated Forest Management Agreement (IFMA).
Una na nga ginpahayag sang alkalde sang banwa nga si Engineer Ray Ruiz nga wala siya sang gahum nga mag-intra sa operasyon sang HAPI, bangud suno sa iya, mismo ang Department of Environment and Natural Resources (DENR) ang nagsiling nga wala poder ang banwa sa proyekto nga yara sa idalum sang IFMA.
Samtang, magabulig naman ang banwa sa pag-serbe sang nagkalain-lain nga biolasyon gikan sa mga ahensya sang gobyerno nga may direkta nga mandato sa pag-regulate sang mga proyekto — IFMA man ukon indi. — BNFM Kabankalan
