LEGAZPI CITY – Pigdeklarar na kasuhapon kan Philippine Drug Enforcement Agency (PDEA) na drug-cleared na an banwaan kan Camalig makalahis maipasar kan Local Government Unit an deliberation sa Regional Site Committee on Drug Abuse Council.
Sa intrevista kan Brigada News FM Legazpi kay PDEA Albay head Noe Briguel, pigsabi kaini, kan taon 2016 nagpuon an kampanya kan ilegal na droga, siring man an barangay drug clearing program, kun saen na-meet kan banwaan an gabos na rekisitos nganing maideklarar na drug-cleared.
Kabale sa basic requirements na naipasar kaini an rehabilitation reformation asin intervention program, kun sain gabos na drug surrenderees asin pushers sa 50 mga barangay an natawan ki intervention rehab sa Balay Silangan.
Segun kay Briguel, magkakaigwa liwat nin validation an PNP asin PDEA kada anom na bulan nganing ma-monitor kun nagigibo an mga programa kontra ilegal na droga.
Pwedesir su boot mawara an bisa kan pagiging drug-cleared sa oras na manutaran nindang nagdadakol an kaso ki droga, o kun warang piggigibong aksyon an Barangay Anti-Drug Abuse Council (BADAC) asin (MADAC) kontra digdi. Kun siring, irerekomendar ninda ini sa Regional Site Committee nganing bawion an pagiging drug-cleared.
Mientrastanto, tinawan nin pagbisto an bilog na barangay bilang drug-cleared barangay huli sa pagtaong suporta kontra ilegal na droga sa saindang barangay.
