MALAMPUSON ang gipahigayon nga bloodletting activity sa Brigada, April 10, 2022 adlaw nga Dominggo sa SM Mall General Santos City.
Alas otso pa sa buntag gisugdan na ang ‘Dugo Para sa Kabrigada’, bloodletting activity sa ikatulong andana sa mall pinaagi sa Red Cross GenSan sa pagpanguna sa Chapter Administrator nga si Merly Gludo.
Sa paghinabi sa Brigada kay Gludo sumala niini nga nagapasalamat siya sa kompanya sa Brigada sa pagpasiugda sa ‘Dugo Para sa Kabrigada’ nationwide kay dili lang kini sa GenSan,nagpasalamat usab kini sa mga working force, mga volunteers ug mga doctor.
Nagapasalamat usab kini nga bisan kon anaa pa sa Level 2 sa pandemya daghan na ang nagatubag sa panawagan sa pagdonar og dugo.
Gidugang ni Gludo nga mahinungdanon kayo ang pagdonar gumikan dili mapalit ang dugo sa mga botika, nagikan gayod kini sa lawas sa donor.
Samtang usa ka ginang nga gikan sa Barangay Calumpang ang malampuson sa pagdonar, si Prenalyn Calatrava, minyo, trabahante sa usaka canning factory, sumala niini nga ika-upat na niya kini nga pagdonar, nag-inusara lang siya kay anaa pa sa lawod ang iyang bana nga mananagat.
Sa miaging ‘Dugo Para sa Kabrigada’ nakadonar usab sila sa susamang venue, ang tumong daw niini adunay magamit nga card sa panahon nga kinahanglan sa ilang pamilya. I Ver Diazon
