POSITIBONG gitudlo sa biktimang kahera ang gitoohang suspetsado sa pagpanulis sa usa ka 7/11 Convenience store adtong mi-aging adlaw sa may Yacapin-Velez St. ning siyudad sa Cagayan de Oro gamit ang kalibre-38 diin malampusong nakuha niini ang liboan nga salapi.
Pamahayag ni Station Commander-Police Major Sebastian Chua sa Police Station-1 Divisoria human aduna silay impormasyon nga nakuha sa location sa maong suspetsado dali nila kining gi-respondehan ug gidala hilayon sa maong Convenience store aron makompirma kini sa kahera diin positibo kining gitodlo, Apan gihimakak usab sa suspek ang maong alegasyon.
Basi sa CCTV footage usab nga gihawiran ni PMAJ Chua nag match ang maong suspek sa oras ug adlaw kung asa natigayon ang pagpanulis sa convenience store.
Suspetsado gi-ilang si Lowel O. Berdos, 21-anyos, Delivery Rider, Residente sa Agora, Brgy. Lapasan ning siyudad kung asa nakuha usab sa iyahang posesyon ang 1 ka hand grenade, usa ka mio-scooter color blue, salapi nga nagkantidad sa kapin 5-mil ka pesos, uniform ug delivery bag sa iyahang kompanya ug ang itom nga raincoat.
Samtang detenado karon ang suspetsado sa Police Station-1 Divisoria alang sa hingpit nga pag-file sa tokmang kaso nga atubangon niini. – END – (AD)
