GILAMOY sa kalayo ang gatusan ka balay sa Purok Saeg, Barangay Calumpang, GenSan sa sunog nga milungtad og halos duha ka oras.
Matud ni Senior Fire Officer 3 (SFO3) Allan Rey Emperio, Chief Investigator sa Bureau of Fire Protection (BFP) – GenSan.
Giimbestigahan pa nila ang pag-ulbo sa sunog ug gisuta pa ang kantidad sa damyos sa mga propedad.
Apan giangkon nga base sa impormasyon sa mga residente sa lugar, dunay usa ka bata nga nagluto pasado alas-2 sa hapon.
Dihang kalit dunay nadungog nga buto dungan sa pagdilaab sa kalayo nga milamoy sa mga kabalayan gikan Zone 1 hangtud 2.
Miabot lang sa unang alarma ang sunog nga nagsugod sa maong oras ug gideklarang fired out alas-5 sa hapon.
Gibutyag usab niini nga nadungog niya gikan sa residente nga dunay mga balay sa lugar nga gihimong storage sa krudo.
Sa bahin ni Barangay Kapitan, Ryan Dupalco gibutang na nila sa gym ang miabot sa 1,025 household nga naapektohan sa sunog.
Magpahigayon usab sila og special session sa Huwebes aron magamit ang porsyento sa ilang disaster fund aron itabang sa mga nasunogan.
Samtang sa tala sa personahe sa Red Cross, tulo katao ang nasamad duha ang residente ug usa ang bombero nga nakatamak og lansang.
Butyag ni Junior Mahinay, nasunogan ug nakahiagum og second degree burn sa nawong, gisugat niya ang bul-og sa kalayo. Aron masalbar ang bisan gamay man lang sa ilang mga gamit sulod sa panimalay. (Richel Gubalani)
