Pilas sa bahin kang hita kang pungyahun ang naangkun kang sangka lalaki nga ginkilala kay Jomarie Aurelio, 37 anyos, mangunguma kag residente kang Brgy. Gen. Luna, San Remigio, matapos nga ginlabo kang darwa ka barangay tanod nga ginkilala kanday alyas Ed kag alyas Boy sa nasambitan nga lugar, kahapon nga adlaw, Agosto 6, las-4:30 sa hapon.
Sa pagpakig-angut kang Brigada News FM Antique kay San Remigio Municipal Police Station Chief PCpt. Paul Joseph Oberio, las-6:50 sa kasisidmun kang Agosto 6, may nagtugro kananda kang impormasyon nga may nagluntad nga insidente kang pagpanglabo sa nasambitan nga lugar.
Naga guwa sa imbestigasyon nga las-4:30 sa hapon kang amo sa petsa, naga-istoryahanay ang biktima kag si alyas Boy tuhoy sa andang indi pag-intindihanay nga nagluntad kang kaagahun kang hinali lang nga nangin mainit ang andang pag-istoryahanay kag nauli sa pagbinaisay sa diin dya ron kag nagpaguwa si alyas Boy kang wara pa ma man-an nga calibre kang armas kag ginhana tiruhon ang biktima apang maswerte nga wara dya naglupok.
Gintinguhaan pa kang biktima nga agawon ang armas kay alyas Boy apang dya ang ginlabo ni alyas Ed halin sa likod sa diin naigo ang biktima sa bahin kang hita kag pungyahun.
Ginhingagaw naman dara kang anang bugto nga lalaki ang biktima sa RHU-San Remigio kag sa urihi, ginsaylo sa Ramon Maza Sr. Memorial District Hospital, sa Sibalom para sa nagakaigo nga pagbulong.
Samtang, pagkatapos kang insidente, nagpalagyo ang mga suspek apang bangud sa ginpatuman nga Manhunt Charlie Operation ang San Remigio MPS, natigayon nga madakpan ang mga suspetsado.
Sa kadya, rugyan si alyas Ed kag alyas Boy sa paghinakup kang San Remigio MPS para sa nagakaigo nga dokumentasyon kag mga tikang.
