Base sa monitoring it Provincial Disaster Risk Reduction & Management Office (PDRRMO-Aklan), ro banwa it Makato ro eubos nga naapektuhan it pagbaha ku Sabado it gabii bangud sa mabaskug nga pagbuhos it uean.
Raya ro ginhayag sa Brigada News FM Kalibo ni Mr. Galo Ibardolasa, Head it PDRRMO-Aklan.
Ro iba pang banwa nga ginbaha hay ro Kalibo, Banga, Numancia ag Malinao.
Ku Dominggo hay nagpatigayun segun sanda it initial damage assessment ag gin-agtunan nanda ro Brgy. Calimbajan, Makato kung siin, umapaw igto ro tubi hasta sa karsada rasun nga apektado ro national road.
Sa banwa man it Malinao hay madaeum gihapon ro tubi ag sa area it Brgy Lilo-an hay may porsyon segun igto it sangka tulay nga may gabot.
Samad man segun ro pilang porsyon it karsada sa Brgy Kinalangay Viejo bangud sa mabaskug nga uean ag pagbaha.
Samtang, owa pa segun imaw it nabatun nga opisyal nga report halin sa 17 MDRRMO sa Aklan kaangot sa assessment it kahalitan sa agrikultura ag fisheries.
Owa man segun it nailistang missing o casualties bangud sa pag-inuean ku adlaw it Sabado. / ANN DESLENE SALAZAR
