KALIBO, AKLAN—Nasapwan eon do bangkay it 57 anyos nga mangingisda nga ginamaduea matapos nga ginsunggaban do andang ginasakyan nga barko ku adlaw it Sabado sa kaeawuran nga sakop it Masbate ag Capiz.
Do bangkay ni Rex Peralta alyas Ricky hay nakita nga nagapaeotaw-eotaw it pilang mangingisda nga taga-Brgy. Andagao, Kalibo sa bahin it municipal waters it banwa it Tangalan bandang alas-9 do kaaganhon.
Madumduman, do nasambit nga mangingisda hay nahueog maghalin sa andang ginasakyan nga bangka kaibahan sanday Gerald Retos ag Leo Arilas matapos sunggaban it barko apang do daywa hay nakaeowas matapos nga buligan it mga mangingisda sa Roxas City samtang si Peralta hay ginmaduea.
Sa makarun hay indi pa matumod kung anong barko do nakabangga sa ginasakyan ng bangka nanday Peralta samtang do Philippine Coastguard-Capiz man do magabuyot sa imbestigasyon bangud nga sakop it andang hurisdiksyon do lugar kung siin natabo do aksidenteng pagkabangga it barko sa ginasakyan it mga biktima. // SHERRY ANNE REUNIR-VIDAL
