Bilyones nga kantidad sa nagkadaiyang imprastraktura ang gibubo sa lokal nga panggamhanan ning syudad sa Davao aron hatagan og kasulbaran ang grabeng mga pagbaha nga masinati sa 41 ka lain-laing lugar sa syudad ilabi na sa La Verna area.
Sumala kang Engr. Ivan Cortez, Head sa City Planning and Development Office (CPDO), dakong pondo ang gigahin sa Department of Public Works and Highways karong 2021 ug moabot sa P100 million alang sa completion sa pumphouse; P50 million sa Construction sa Retarding Basin; P105 million alang sa improvement sa La Verna Creek; ug, P3 million alang sa rehabilitation/improvement sa drainage system.
Alang sa tuig 2022 sa susamang lugar pa gihapon anaa sa P395 million ang gitagana alang sa construction sa drainage structure ug P340 million construction sa retarding basin samtang sa tuig 2023 langkuban kini sa P300 million construction sa retarding basin ug P500 million improvement of the La Verna Creek.
Lakip usab sa giusgyot pondohan sa Japan International Cooperation Agency (JICA) isang P507 million construction, land acquisition, ug compensation sa Sasa Creek Drainage Area.
Gipresenta usab ni Cortez ang uban pang flood mitigating infrastructure plans sa City Engineers Office (CEO), DPWH, ug JICA alang sa 40 ka areas nga unang na-geotagged sa Davao City Risk Reduction and Management Office (CDRRMO) nga sagad maapektuhan sa higayon nga moawas ang Davao River, Matina River, Lasang River ug ubang mga sapa.
Samtang pito ka lakang ang girekomenda sa CPDO nga angay sundon nga gilangkuban sa geotagging sa kinatibuk-ang lugar nga maagian sa baha, accurate risk mapping, pagpangita og alternatibong agianan sa drainage, hugtanong pagsunod sa contour maps sa JICA alang sa tanang umaabot nga drainage projects, ug ang subling paglusad og survey aron ma-korehian ang mga sayo; pagbalik sa natural waterways; regulate earth-filling activities; ipadayon ang reopening sa baradong drainage bisan pa man kini magkinahanglan og land acquisition; ug ang pag-implementa sa girekomendang JICA flood control projects sa DPWH ug CEO.
