Nagpabalhag sa Roxas Component City Police Station ang isa ka negosyante matapos nadula ang iya bag nga naga-unod sang P36,000 nga cash sa sulod sang ila balay sa Westlake Subd, Brgy. Dayao, Roxas City.
Ginkilala ang biktima kay Ali Tarawi, 56-anyos, residente sang nasambit nga lugar.
Sandig sa iya ginpabalhag, ginbutang niya sa ila sofa ang iya sling bag.
Ginpahayag sang biktima nga nagpadulong sa ila balay si Joseph Berosa kag gintanyagan siya motorsiklo nga pautang.
Apang siya ang nagbalibad bangud wala pa nakapadala sang kwarta ang iya manghud.
Dugang pa sini, madasig nga naglakat si Berosa sa iya puluy-an samtang siya ang nagaluto sa kusina. Sang iya na ginpangita ang iya tuwalya, nadiskubrehan sini nga wala na sa sofa ang iya bag.
Nalakip sa unod sang bag ang yabi sang iya motorsiklo, driver’s license kag iban pa nga dokumento.
Sa karon, desidido ini nga magpasaka sang kaso sa suspek kun ini ang madakpan. | Judy Ann Juare
