Badil asin iligal na droga, nakumpiskar sa sarong lalaki sa isinagibong gun-bust operation sa siyudad kan Legazpi

LEGAZPI CITY – Nakumpiskar sa sarong lalaki an badil asin iligal na droga sa isinagibong gun-bust operation kan mga personahes kan Legazpi City Police Station (CPS) sa pangengenot kan Acting COP kan hepatura na si PLTCOL Ray Anthony M. Villanueva sa siyudad kan Legazpi.

Segun sa nasambit na hepatura, an operasyon subuot isinagibo bandang 10:30 nin banggi kan nakalihis sanang semana sa Purok-2, Brgy. 30-Pigcale, Legazpi City, kun sain nakumpiskar sa sarong 32-anyos na lalaki, warang agom, asin residente kan nasambit na brgy. an sarong caliber revolver na warang papeles, kaiba an duwang (2) pidasong heated plastic transparent sachet na may laog na white crystalline substance na pinagtutubudang “shabu”.

Kasabay man na nakumpiskar sa suspek an kwartang nagkakantidad nin P4,500 na ginamit bilang buy-bust money.

Nahahampang ngonian an nasambit na suspek sa mga kasong pagbalgar sa RA 10591 o Unlawful Manufacture, Importation, Sale or Disposition of Firearms asin RA 9165 o Comprehensive Dangerous Drugs Act of 2002. Presente nang nagtitinir an suspek sa Legazpi CPS para sa magkakanigong disposisyon.

Leave a Reply

Your email address will not be published. Required fields are marked *