Gina-abi-abi sang grupo sang mga manunudlo sa syudad sang Bacolod ang ginaduso sang Department of Education nga expanded face-to-face classes. Ginpahayag ni Dr. Richard Gelangre, Presidente sang Bacolod City Public School Teachers Federation Association may rekomendasyon ang Dep-Ed Bacolod sa regional office sang mga eskwelahan para sa nasambit nga katuyu-an kasunod nagpaso na sadtong nagligad nga bulan sang Disyembre ang “experimentation” sang F2F class kun sa diin diri sa syudad ang Alangilan National High School ang nalakip sa amo nga programa.
Ang pagpatuman sang expanded face-to-face program may kaangtanan sa alert level category sang syudad sang Bacolod nga yara sa alert level 2 kag iban pa nga mga lugar sa pungsod kag sa ginalantaw nga de-escalation sa pag-abot sang bulan sang Marso.
Ginpasalig ni Gelangre handa ang tanan nga mga manunudlo para diri kasunod mayoriya sang mga ini ang lunsay nakabaton na sang bakuna kontra sa Covid-19. Ginasigahom man sini magatapos na ang pag-atubang sang mga pumuluyo sa pandemic kag maangkon na ang herd immunity ukon ang population protection kag mangin paborable ang sitwasyon agud sa sina mabuksan na sa mga kabataan ang mga buluthu-an sa Bacolod. Via| Nimrod Zabala
