PATAY ang usa ka babaye homan kini gipusil sa iyahang kaipon sa BH Garces Street Barangay Cansojong,Dakbayan sa Talisay kagahapon pasado alas tres sa hapon.
Ang biktima giila nga si Janine Ubas 29-anyos,online seller, adunay usa ka anak kaniadto ug usa ka anak sa kapuyo nga mao ang suspek ug giila nga si Jaire Guba,27-anyos.
Nasayran base sa igsuon ni Janine nga si Joy Ubas nga sa wala pa ang insidente misumbong matud pa si Janine sa iyaha pagka-buntag nga nadapatan siya ni Jaire tungod lang sa agda sa pag-kaon samtang pasado alas 2 sa hapon, nag-away na sab kini ug nakadungog ang usa niini ka igsuon nga si Joselle Ubas sa pikas kwarto sanglit plywood ra man ang bongbong niini og matud pa mihisgot na si Janine nga moundang na sa ilahang relasyon ug ang sunod nga nadunggan mao na ang boto sa pistola.
Dali nga migawas si Joselle ug iyaha sab nakita si Jaire nga migawas bitbit ang armas nga kalibre 45 ug anaa sa kilid ang 4-anyos nila nga anak nga usa ka special child ug mipadayag kini nga buot kining mo-surrender.
Base usab sa inahan sa biktima nga si Cherel, kanunay mag-away ang iyahang anak ug ang kaipon niini ug gani perme sab kining dapatan sama sa pagpanamparos.
Giingong makadaghang higayon ng gustong makig-buwag si ni Jaire apan hulgaon kini nga buk-on ang ulo ug patyon ang tibuok pamilya.
Ang ig-agaw usab ni Janine, kinsa dili lang magpahingan, mibutyag nga sa milabay nga mga buwan misumbong kaniya ang iyang ig-agaw pinaagi sa chat nga aduna matud pay laing babaye ang suspek.
Base sa mga silingan, nagumon sab matud pa sa ginadiling drogas ang suspek .
Sa samang bahin ,gi-asoy ni Talisay City Police Investigator Patrolman Melfred Labitad nga naabtan nilang nagtakilid nga naglinkod ang biktima nga naligo na sa kaugalingong dugo human na-angkon kini ug samad pinusilan sa iyang ulo.
Nasayran usab nga adunay pending nga kaso sa pagpamusil ang suspek.
Ang suspek sa dihang gipangutana kung nganong nabuhat niya ang maong krimen,igo lang mibutyag nga nawagtang siya makadiyot sa iyang huna-huna og wala na mihatag og dugang detalye kalabot sa hinungdan sa ilahang away.
Sa pagkakaron, giasoy ni Police Corporal Christopher Lerio nga ang pagka-igihan ug pagka-seloso ang ilahang gitan-aw nga motibo nganong nabuhat sa suspek ang maong krimen.
